Lugina Vision

Zgjedhjet parlamentare në Serbi

DREJT IZOLIMIT OSE INTEGRIMEVE EUROPIANE

Politika shqiptare në përgjithësi përkrah idenë se shqiptarët duhet të jenë pjesë e proceseve integruese aty ku jetojnë. Përveç përkrahjes së Shqipërisë dhe Kosovës për pjesëmarrje në zgjedhjet parlamentare, spektrin politik shqiptar të Luginës gjatë javëve të fundit e kanë takuar edhe ambasadorët (në Beograd) të shteteve më me ndikim në politikën botërore, të cilët kanë ftuar që edhe shqiptarët të jenë pjesë e procesit të zgjedhjeve parlamentare.

Në Republikën e Serbisë, më 11 maj, të këtij viti, do të mbahen zgjedhjet parlamentare dhe ato lokale, të cilat do të organizohen në ato vende që funksionojnë sipas legjislacionit të këtij shteti.
Zgjedhjet parlamentare në Serbi, kanë shtuar një interesim të madh të opinionit sepse këto do të mund të orientojnë popullin në dy kahje të mundshme, në atë drejt izolimit dhe atë drejt integrimeve europiane. Sipas vlerësimeve të shumë analistëve politikë vendorë dhe ndërkombëtarë, rezultati i zgjedhjeve parlamentare do të jetë çelësi i suksesit apo i ngecjes.

Koalicioni

Në zgjedhjet e fundit parlamentare, të 21 janarit të vitit 2007, shqiptarët e Luginës së Preshevës participuan me listën e përbashkët "Koalicioni i Shqiptarëve të Luginës së Preshevës", që përbëhej nga Partia për Veprim Demokratik dhe Bashkimi Demokratik i Luginës.
Ky koalicion me një mund të madh mezi arriti të sigurojë një vend në Parlamentin e Serbisë, që u përfaqësua nga Riza Halimi, kryetar i PVD-së. Edhe pse koalicioni i lartpërmendur gjatë fushatës parazgjedhore pati premtuar elektoratit se përmes përfaqësimit të tyre në institucionet qendrore do të zgjidhen shumë probleme jetike për shqiptarët e këtij rajoni, ato mbetën vetën të shkruara në programin e tyre parazgjedhor dhe asgjë më shumë.
Ndërsa, edhe në zgjedhjet parlamentare, të këtij viti, spektri politik shqiptar i rajonit të Luginës së Preshevës ka qëndrime të kundërta ndaj pjesëmarrjes në këto zgjedhje. Disa nga partit shqiptare kanë deklaruar pjesëmarrjen, ndërsa disa subjekte politike janë shprehur se do të bojkotojnë këto zgjedhje, me arsyetime se participimi i tyre në parlament nuk do të ndikojë në përmirësimin e jetës së shqiptarëve. Pra, politika jonë akoma nuk mundë të formojë një qëndrim unik ndaj çështjeve që janë apo nuk janë me interes për popullsinë shqiptare të këtij rajoni.

Bekimi

Spektri politik shqiptar ka zhvilluar takime me udhëheqësit më të lartë politik dhe shtetëror të Shqipërisë dhe Kosovës, nga të cilët kanë marrë bekimin se duhet të mendohet mirë për pjesëmarrjen apo bojkotimin e zgjedhjeve parlamentare të 11 majit.
Politika shqiptare në përgjithësi përkrah idenë se shqiptarët duhet të jenë pjesë e proceseve integruese aty ku jetojnë. Përveç përkrahjes së Shqipërisë dhe Kosovës për pjesëmarrje në zgjedhje parlamentare, spektrin politik shqiptar të Luginës gjatë javëve të fundit e kanë takuar edhe ambasadorët (në Beograd) të shteteve më me ndikim në politikën botërore, të cilët kanë ftuar që edhe shqiptarët të jenë pjesë e procesit të zgjedhjeve parlamentare.

Pjesëmarrja

Këtu duhet të ceket vizita e ambasadorit të SHBA-ve në Beograd, Kameron Manter, që zhvilloi takime me përfaqësuesit politik shqiptar dhe ftoi, që shqiptarët e Luginës së Preshevës të marrin pjesë në zgjedhjet parlamentare dhe pas përfundimit të vizitës, Manter tha se ata që bojkotojnë zgjedhjet parlamentare janë kundër interesave të SHBA-ve. Andaj, duke pasur parasysh këto mbështetje dhe sugjerime, partitë politike shqiptare duhet të mendojnë seriozisht për hapat që duhet të merren drejt zgjidhjeve të problemeve shqiptare në Luginë të Preshevës, atëherë mos humbi kohe sepse koha nuk pret, orientoni popullin se cilën rrugë duhet ndjekur dhe çfarë duhet bërë.
Nxitoni dhe mos prisni ?

Autori është gazetar i pavarur në Luginën e Preshevës.