Shkruan: *Bardhyl Metaj, Zürich
Në lidhje me një arrtikull në javoren gjermane "Der Spiegel"!

Kosova në "Der Spiegel": Republikë Bastarde edhe pa Shkëlzen Maliqin!

Më ngjanë shumë rrallë, që të mos e lexoj javoren "Der Spiegel"!
Jam abonues dhe lexues i rregullt i saj, që nga viti i largët 1990, e kam si një lektyrë obligative javore, çoftë për shkak të spektrit të gjerë të temave botërore që trajton, apo edhe për shkak të profesionalitetit në trajtimin e tyre, që e ka gjithherë!
Artikullin e saj të fundit mbi Kosovën, u detyrova ta ri-lexoj ndërkaq, më shumë se një herë…! Shkas i parë u bë një shoqe e imja nga Prishtina, e cila sapo e kishte lexuar të përkthyer në Koha Ditore, në një e-mail të saj që ma drejtonte për këtë artikull, me gjasë që të zbrazej diku e te dikush, shfrynte plot mllef kundër portretit të Kosovës në Der Spiegel, por edhe realitetit në Kosovë!

Për herë të tretë, artikullin mbi Kosovën, tashmë të ri-titulluar "Republika Bastarde e Kosovës!", e lexova ndërkaq, kur analisti dhe publicisti shumë i profiluar, profesional dhe shumë serioz i Kosovës, z. Shkëlzen Maliqi, në Editorialin e gazetës Express, 3 Maj 2008, shfryente me shumë lehtësi, kualifikime të paqëndrueshme dhe gjuante në drejtim të javores gjermane, si me një "saçmaricë" të huazuar, një arsenal kualifikimesh, të cilat si të tilla dhe si përgjithësime, assesi nuk qëndrojnë...

E kuptoj drejtë, dhe besoj në vërtetësinë e shpalimeve që bënte Shkëlzen Maliqi, në reagimin dhe sqarimin e tij! Dhe, Shkëlzen Maliqi vërtet ka një profil të tillë të ndërtuar publik, që nuk ka nevojë për demantime, kur ngjanë që të jetë keq interpretuar, siç me siguri i ka ngjarë me këtë rast!

Por, pas parasysh ndikim e tij shumë të madh në opinion, si të bëj me kualifikimet, vërtet subjektive e të pa matura, që ai i bënë javores shumë profesionale e me renome "Der Spiegel-it", kur shkruante në Editorialin e tij se: "Shkrimi tendencioz si ky i Der Spiegel, është si një tagër që duhet të paguhet lirisë së shtypit dhe të qarkullimit të ideve. Por, Der Spiegli nuk është se paraqet të vërtetën e fundit. Jo një herë kjo pasqyre e ka paraqitur Kosovën me imazh të deformuar, të shpifur, me gjysmë të vërteta, teprime, gënjeshtra"!

Tash, te gjithë ata që kanë lexuar artikullin e fundit për Kosovën, të javores Der Spiegel, në Koha Ditore apo në origjinalin gjermanisht - i cili pa dyshim se ishte shumë jo afirmativ për shtetin më të ri të globit, dhe për atdheun tonë - dhe të cilët po lexojnë këtë Kolumne, me siguri se shtrojnë pyeten: por çfarë ka ky Kosovari, ky farë B. Metaj, që po merë në mbrojtje një javore gjermane, po çoftë edhe Der Spiegel-i famëmadh, edhe përkundër faktit, se kjo e fundit ka baltos fytyrën e atdheut të tij - Kosovës? Bile po e bënë këtë, edhe për-kundër publicistit, të cilin po e ç`mojka shumë, z. Shkëlzen Maliqi, e i cili, ia kish fut Spiegl-it, boll mirë...!

Kjo dilemë eventuale e lexuesit, nuk mund të zgjidhet mbi recidivet, mbi mungesën e patriotizmit tim...!

Çështja duhet shtruar në një rrafsh e dilemë krejt tjetër:
- Çfarë të bëjmë, kur trishtohemi nga ajo çfarë shohim - kur kemi pasqyrën përballë?
Apo kur dikush, në këtë rast, "Der Spiegel", i vë Kosovës pasqyrën përballë?
- Ta thyejmë pasqyrën?
- Ta për-baltojmë!
- Ta kualifikojmë si pasqyrë me prodhim të dyshimtë, e punuar nga ndonjë shërbim i huaj, me qëllime të errëta për Kosovën dhe shqiptarët?
Të themi se: "Jo një herë kjo pasqyre e ka paraqitur Kosovën me imazh të deformuar, të shpifur, me gjysmë të vërteta, teprime, gënjeshtra"

Jo! Duhet ta ndërrojmë realitetin e Kosovës!
Atë, pasqyrën që na e kishin vu përballë, redaksia e javores gjermane dhe publicisti i rryer, Walter Mayr, nuk ishte e prodhimit të dyshimtë! As me t`shtime...!
Njëjtë, shkruante kohë më parë, edhe një javore tjetër shumë prestigjioze, zvicerania "Weltwoche"! Njëjtë gjejmë edhe në shtypin Kosovarë! Dhe me të drejtë!

Shkrimet, në të dy këto raste, ishin bazuar në shumë studime, analiza e dokumente internacionale e Kosovare, si dhe në shumë deklarata të politikanëve shumë të lartë ndërkombëtare, por edhe të përfaqësuesve politik e të shoqërisë civile në Kosovë!

Dua të them se Kosova në këto artikuj, ishte Republikë Bastarde, edhe pa citimin fatkeq të Shkëlzen Maliqit!
Dhe Kosovës, ndërkaq, kanë me ju vu edhe në të ardhmen, shumë e shumë herë pasqyre përballë!
Në vend se ti thyejmë ato pasqyre, ndoshta është më mirë, ta shikojmë veten drejt në sy...e ti përvjelim duart...!

Përndryshe, do të bëhemi kopje e Serbisë, e cila, s`ka lanë pasqyrë botërore pa thyer!
Apo`jo?