Në Tërnoc të Bujanocit

GËZIMI KTHEHET NË HIDHËRIM

Në Tërnoc të Bujanocit, nga mijëra qytetarë, iu dhanë nderimet e fundit maturantit Veton Salihu, i cili pësoi në një incident trafiku, pas kremtimit të mbrëmjes së maturës, me ç' rast nga një përplasje makinash, janë lënduar rëndë e lehtë edhe 6 të tjerë.
Maturantët e Shkollës së Mesme "Sezai Surroi" nga Bujanoci, kanë kremtuar të shtunën e 7 qershorit, mbrëmjen e maturës dhe pas manifestimit të këndshëm, ky gëzim është shndërruar në tragjedi. Sipas burimeve të mësimdhënësve të këtij gjimnazi, deri në momentin tragjik dhe shume të dhembshëm, kremtimi ka qenë shumë mirë i organizuar duke filluar nga sfilata nëpër qytetin e Bujanocit e gjeri në orët e vona të mbrëmjes.
Përkitazi me këtë, njoftohet se shkaku i tragjedisë ishte bërë kur maturantët në fjalë me vetura nga Bujanoci, pas ahengut, kishin ardhur në Preshevë dhe shih për këtë, nga shpejtësia e madhe që ngisnin, në një moment ishte shkaktuar ndeshje mes veti që mori një jetë dhe u lënduan rëndë. Po ashtu merret vesh se të lënduarit janë vendosur në qendrat e ndryshme spitalore të Serbisë si në Beograd, Nish dhe në Vranjë.
Më 9 qershor, në Shkollën e Mesme "Sezai Surroi", në Bujanoc, u mbajt një orë komemorative dhe në mënyrë të organizuar profesorët dhe nxënësit e kësaj vatre arsimore i dhanë nderimet e fundit te varrezat e Tërnocit, maturantit Veton Salihu.
Në ceremonialin e varrimit morën pjesë mijëra njerëz nga Komuna e Bujanocit dhe më gjerë. Nuk mbahet mend në këto 10 vjetet e fundit të jetë mbajtur një varrim i tillë me kaq masivitet.
Të fundit nga i ndjeri Veton Salihu, u ndanë profesorët, nxënësit dhe familjarët e tij, duke lexuar letra komemorative dhe duke vënë kurora.