Shkencë

SONDA PHOENIX DËRGON FOTOT E PARA NGA MARSI

Një sondë amerikane robotike ka dërguar një seri pamjesh nga sipërfaqja e Marsit disa orë pasi u ul pranë polit verior të planetit.

Fotot e para bardhë e zi, ishin kryesisht për të sjellë informacione lidhur me kushtet e sondës dhe konfirmuan se ajo ishte ulur dhe kishte hapur panelet solare që janë esenciale për punën e saj.
Në fotografitë e tjera tregohej horizonti dhe pllajat artike si edhe pamje të një pejsazhi që i përngjante rajoneve të ngrira të Tokës.
Sonda me emrin Phoenix, është e para që arrin të ulet pranë një prej poleve të planetit Mars.
Ajo do të qëndrojë për tre muaj për të hetuar nëse planeti mund të ketë patur jetë.
Përpjekjet e mëparshme për t'u ulur në Mars kanë dështuar.
Ulja e sondës u ndihmua nga një mbrojtëse prej nxehtësisë, parashutë dhe raketa retro.
Megjithë shqetësimet e shkencëtarëve, ulja e sondës në sipërfaqen e Marsit u shoqërua vetëm me një shtëllungë pluhuri.
Gjatë një konference për shtyp, Dr. Charles Elachi nga NASA lavdëroi punën e bërë nga ekipi për uljen e sondës në Mars:
"Gjatë të gjithë historisë së eksplorimeve gjithmonë janë kërkuar njerëz kurajozë që kanë një përkushtim mbinjerëzor. Dhe janë këta njerëz kurajozë që çuan Phoenix në sipërfaqen e Marsit."
"Ky ekip ka bërë histori dhe ata do të mbahen mend përgjithmonë si njerëzit e parë që eksplorojnë rajonin polar të Marsit," tha zoti Elachi.

Shkencë

NË VITIN 2020, HËNA DO POPULLOHET ME NJERËZ

Agjencia kozmike amerikane NASA lajmëroi se do të ndërtojë baza në Hënë në të cilat astronautët do të mund të qëndrojnë edhe më shumë se gjashtë muaj.

Karl Valc, njëri prej drejtorëve të departamentit të misioneve kozmike në NASA, deklaroi se ndërtimi i bazave është pjesë e projektit për kthim të SHBA-s në Hënë deri në vitin 2020.
Në baza do të ketë sisteme transportuese dhe sisteme të tjera të cilat do t'u mundësojnë astronautëve të jetojnë, të punojnë dhe të ndërtojnë infarstrukturë edhe t'i shfrytëzojnë resurset që i mundëson Hëna.
NASA përpilon plane për prezencë më të përforcuar të njerëzve edhe në trupa të tjerë qiellore në sistemin Diellorë, por edhe jashtë tij. (info sot)

---

Teknologji

WINDOWS VISTA NË GJUHËN SHQIPE

Ka përfunduar me sukses lokalizimi i Windows Vista-s në gjuhën shqip.

Siq njofton QEP (Qendra për Edukim dhe Përparim) pas një pune pothuajse dyvjeçare, kan përfunduar me sukses lokalizimin e Windows Vista-s në shqip.
Gjatë këtij procesi ka pasur një bashkëpunim të mirë me Institutin e Gjuhësisë dhe të Letërsisë në Tiranë. Kuptohet, e gjithë puna është bërë për nevojat e klientëve të Microsoft-it dhe të gjitha të drejtat janë të rezervuara nga Microsoft-i.
Më herët QEP ka bërë lokalizimin në gjuhën shqipe edhe të Windows XP dhe Office 2003.
Këto pako mund ti shkarkojnë vetëm shfrytëzuesit e Microsoft Windows të liçencuar, duke kaluar së pari hapin e verifikimit.

---